Eric Kwok、森美同李茵彤主持嘅节目《唱钱》眨吓眼就播出最尾一集，台前幕后联同有份上节目挑战嘅歌手朋友一齐出席慰劳宴睇节目。
森美直认唔舍得节目同Desta嘅笑容，话Desta笑容由《唱钱》伸延到大家可以晚晚喺《爱．回家之三代同糖》见到佢，所以《唱钱》唔使再做，仲话Eric Sir应该加入《爱．回家之三代同糖》同车婉婉合作，佢自己就加入做Eric Sir嘅阿仔，Desta闻言话做仔有啲争议。
《唱钱》最终回当然有彩蛋环节，森美上埋台挑战Level 1，话事前用咗近半个月准备，不停翻睇《今期流行》，佢自觉唱功未必系好，不过舞蹈就跟得上古天乐，加上喺节目有彭家贤同侯隽熙伴舞，令整个演出增添可观性。
Eric Sir同样唔舍得节目结束，不过佢就好开心，因为节目令好多人嘅听觉变得敏锐，分得出音准，佢当然想节目长做长有，因为台前幕后付出好多。Eric Sir话唔舍得《唱钱》心情等同唔舍得XiX，而XiX成员早前亲手整咗张感谢卡畀Eric Sir，答谢对方一直提拔帮助。
