日本女星渡边直美现身台湾联同刘以豪、小薰等出席新戏宣传活动，呢次亦系直美第一次拍宝岛嘅电影，佢话剧组嘅大家都好照顾佢，仲学咗几句台语。被问到会唔会想再拍摄台湾电影时，直美表示目前虽然未有再收到台湾剧组邀约，但系呢次拍摄令佢拥有好多新体验，尤其系「放饭」文化。
渡边直美话喺日本系固定放饭时间，但喺台湾就大家一见饭到，就会即刻话「饭来了」，对于大家嚟讲，食饭系一件好重要嘅事。
直美同刘以豪开工第一日嘅对手戏就已经系亲密床戏，剧情讲述佢要将似醉酒嘅以豪扶到床边，直美就话当时心情非常紧张，但以豪好专业，更大赞以豪身材好又靓仔，成个人都系100分完美。以豪就话自己当时惊讶第一场戏已经系床戏，但以呢个方式关系破冰都好好。
直美偶像徐若瑄亦有参演电影，因为拍摄行程冇重叠，所以直美好难见到偶像。呢次嚟台湾，直美就追星成功，同Vivian聚餐。不过直美就向Vivian表示，自己由细个已经系Vivian粉丝，当Vivian问佢由几岁开始，佢就话十岁，Vivian即刻叫佢唔好再讲。直美大赞Vivian温柔亲切，仲邀请佢一齐清唱「黑色饼干」经典歌曲，令佢好似梦想成真。