叶蒨文 Sophie 同 曾展望GM 呢对相差5岁嘅姊弟恋，自从喺恋爱综艺节目《女神配对计划》成功配对后，一直都爱得大方又缠绵，两个人无时无刻都派闪光弹，更吸引一班CP粉。虽然有人质疑两位系咪扮情侣，亦有人认为佢哋经常情侣档现身，睇得有少少厌，不过都无阻「GPS」嘅情比金坚。
Sohpie曾经分享自己渴望未来同伴侣生儿育女嘅打算，近期佢喺社交平台透露自己有雪卵计划，即时引嚟网民揣测佢同GM系咪对迈入人生新方向有唔同计划。Sohpie回复一篇问各位90后人生规划同生活嘅文章，佢表示：「1992年！ 劲想要小朋友，但系而家完全唔ready，明白有咗小朋友完全系第二种生活模式，目前仲想过自由嘅生活！ 所以准备去雪卵😆」，仲话自己做紧Research，希望今年或者下年可以做到，到时亦有可能拍片分享心路历程。
Sohpie呢个留言就吸引唔少网民回复，有人认为佢知道自己想要咩系一件好事，而且35岁卵子质量会下降，所以雪卵系好事。但亦有人问佢「同GM倾过未？」仲认为系GM未准备好做爸爸，先令Sohpie要雪卵。
Sohpie亦大方回应：「呢个系个人心态嘅问题，同埋准备好步入做家长未，系同另一半无关，因为妈妈系一个好重要嘅职责，而且个生活模式完全会唔同，我自己仲系想体验人生所以觉得未准备好。」解释想雪卵同另一半无关，亦表示因为身边朋友陆续结婚有小朋友，所以明白生活会变得好唔一样，要准备好先可以成为非常负责任嘅父母。而Sohpie呢个心态亦得到网民赞赏。
