恋爱真人骚《女神配对计划2》开播第一集已经造成热话！各位喺海选出现嘅求爱勇者外型同表现都令人津津乐道，花生满满。
其中一位26岁，职业冷气技工、副业歌手嘅中葡芬混血儿方智弘（Oscar），被撞样似福山雅治、吴伟豪及凤小岳，一出场已经令主持人阿Bob林盛斌同关嘉敏都流晒口水，被Oscar俊美外表吸引得五体投地，就连社交平台都出现「屋企突然要洗冷气挥手区」，远至海外嘅网民都加入洗版，要求Oscar上门整冷气。最好笑系，就连 吴若希 都对Oscar极为心动，留言：「！！我屋企有冷气坏呀」」仲话屋企嘅嘢由佢处理开，唔驶麻烦老公Alex。myTV SUPER重温《女神配对计划2》众求爱勇者表现
不过由于Oscar外型太完美，又同朋友组过男团出道，所以有人认为有「做媒」造马之嫌，但曾经揾过Oscar洗冷气嘅客人及Oscar旧同事及前老板都轮流发文力撑佢为人，就连阿Bob都要出Post讲返两句：「原则上佢嘅正职系整冷气，兼职先系做歌手」、「其实而家呢个娱乐圈，无论系做演员定歌手，好多都有做几份工作，努力去维持生计，先可以继续去追梦，因为唔系个个都系最红𠮶啲，所以我真系完全唔觉得有啲咩问题，亦都唔系乜嘢做媒，佢真系自己上网报名参加。」
而Oscar接受电台访问时，表示自己虽然热爱唱歌，但现阶段喺演艺界依然系新人，幕前收入难以支撑生活，所以洗冷气系主要收入来源，唱歌就系副业。
佢亦承认节目播出后人气急升：「我个IG DM系爆咗嘅，起码有7、800个人话即刻想约洗冷气。」Oscar亦提到，佢所组嘅男团出道一、两年都未有太多人认得，结果《女神配对计划2》播出后，即使只系露面分几钟，搭电梯时已经街坊认得佢，仲为佢打气，令佢受宠若惊。