由 王祖蓝 主持嘅新节目《蓝朋友・旅朋友》，即将喺9月14号开始同大家见面。呢次节目将会踏足广西、福州同温哥华三地，祖蓝仲会带埋太太李亚男以及一班「新朋友」 潘静文、 刘倬昕 同埋 吴兆麟 一齐出发。
呢次祖蓝可以公器私用，同亚男寓工作于拍拖，仲可以顺道探下温哥华嘅一班老友，好似 钟嘉欣、 岑丽香同 张嘉儿。亚男就话，其实每年佢哋都会返温哥华见老朋友，呢次最令二人惊讶系拍摄时同老友倾到喊。至于讲到夫妻档拍节目嘅浪漫时刻，亚男就话两公婆有撑台脚，祖蓝亦有展露厨艺煮饭。
虽然祖蓝同亚男嘅细囡年纪细细，不过已经开始对爱情充满憧憬，祖蓝仲话囡囡已经告别由三岁开始到五岁嘅初恋，因为对方疏远佢，但囡囡宜家已经进入第二段感情。问到如果两个囡囡十几岁拍拖会唔会接受到？亚男就话，最重要系囡囡们愿意同佢哋分享，唔好收埋收埋唔讲。
Sherman、Sam同埋Alan呢次可以跟住祖蓝周围玩、周围食，佢哋都话大开眼界。不过最令Sherman难忘嘅反而系要同祖蓝喺山上唱情歌！Sherman形容感觉好得意，当佢望住祖蓝时，最后都系决定望返出去，令大家都捧腹大笑。
关嘉敏 喺恋爱真人骚《女神配对计划2》担任花生团成员，当佢见到冷气技工混血Oscar时即刻露出心心眼，仲忍唔住话：「我屋企嘅冷气突然坏晒。」呢日Carmen为记招担任主持，佢亦被泉叔关心屋企嘅冷气机状况。Carmen形容Oscar真人靓仔过上镜，一开始完全冇谂到Oscar咁靓仔。
Carmen嘅感情状况一直备受关注，虽然由《女神1》到宜家已经一年，但Carmen继续未有著落保持单身，佢就话目前工作行先。面对大家关心佢会唔会做隐藏女神去踢馆，Carmen就好谦虚话今届女神个个高质，自己会争唔过，所以做花生团就好。
