今年系已故巨星 张国荣 嘅70岁诞辰，哥哥生前经理人 陈淑芬 特别策划张国荣70诞辰纪念展，当中展出近300件展品，包括多套哥哥喺舞台上嘅经典战衣、饰物同鞋等，其中哥哥喺《跨越97演唱会》时著过嘅一对红色闪闪鞋、金色外套、条子恤衫衬绿色闪裤，以及佢喺90年时告别乐坛演唱会上著过嘅斗蓬，还原昔日时尚风彩。
除咗衣著之外，仲有无数哥哥嘅唱片、奖项荣衍、电影海报、手稿歌词以致fans嘅笔迹，展览会亦重置温哥华一张纪念哥哥嘅长椅，希望大家透过展览好好回顾哥哥精彩一生。
展览亦特别加插重组哥哥旧居场景，同粉丝分享镜头后生活化一面嘅哥哥，其中一个角落仲摆设咗一张大合照，陈太指呢张相系哥哥离世后首个生日，一班朋友都担心唐唐，所以相约去哥哥生前挚爱唐鹤德屋企聚会，然后影咗呢张合照。陈太亦感谢唐唐提供大量展品，特别系其中一张书台，系哥哥生前放置喺书房中，而且系经常使用。
而喺嚟紧嘅纪念演唱会上，陈太透露会有许冠杰、莫文蔚、张卫健、陈洁灵及新一代嘅后荣迷歌手参与，而揭幕礼上，亦曝光 钟镇涛 女儿 钟懿 献唱嘅一首新歌纪念哥哥。
