Twins㖊日宣布12月中将喺湾仔会展举行一连三场Sidetrack演唱会。呢次开show唔玩红馆大场，蔡卓妍（阿Sa）同钟欣潼（阿娇）今次以歌会友，要跟fans嚟个近距离「肩并肩」接触。
今次扚起心肝开Sidetrack show，阿Sa话以前出咗好多专辑，并非每张专辑嘅歌都可以派台：「入面有好多沧海遗珠、好多好歌，好想趁呢个机会唱番俾fans听。」对于歌迷笑言佢哋经常「走数」，阿Sa即刻耍手拧头：「唉！唔关我哋事。」阿娇亦和议：「嗱！同找数冇关系嘅，系纯粹我哋想开。」
呢次选址会展，阿Sa解释因为Sidetrack，唔想要一个咁大嘅场地，佢笑言惊唔够人，阿娇坦言唔担心：「我觉得Sidetracke嘅歌会系跟得好贴嘅歌迷先会识唱，同埋又可以同大家近距离啲，感觉唔需要太大嘅台面。」
阿Sa提到之前睇过容祖儿Sidetrack演唱会，好钟意𠮶种温馨感觉，坦言想同fans距离近啲：「今次就攞个中间，唔系细到好似阿祖咁细，又未至于大到好似红馆咁大。」阿Sa话冇刻意向祖儿取经，各有各做，阿娇就好想有一个以歌会友嘅感觉，阿Sa大赞阿娇：「你真系讲得好好呀，哈哈。」
阿Sa喺歌单方面坦言第一轮选出60多首Sidetrack，再筛选剩40几多首，阿娇问道：「我哋要唱几多首呀？」阿Sa预计二十多、三十首，阿娇就话：「再加你心软啦，加多10首，我谂三十几四十差唔多。」佢哋喺拣歌𠮶阵，对佢嚟讲全部系新歌，笑言「实在太陌生」。
阿Sa话大概知道fans喜好，「因为我哋每一次开演唱会到最尾点歌𠮶一part，有啲歌佢哋永远重复又重复咁样点」阿娇就话有佢哋两个就够啦。
演唱会名为「Side by Side」，阿Sa指跟阿娇二十几年嚟，二人都系肩并肩一齐去跨过无论系开心定系唔开心，高光或者低谷嘅时候，佢哋都系肩并肩。至于海报赛车手造型，阿娇就话：「Track（跑道）吖嘛。」阿Sa解说：「落Track呀我哋。即系呢一条路其实一路都系我同阿娇两个一齐冲，同埋我哋真系未试过赛车手嘅造型，扮鬼扮马我哋都扮得多啦。」
