王镇泉 Jeoffrey 每星期为你提供最热辣电影资讯，中外猛片专访花絮上映时间全部集齐。泉叔今个礼拜就介绍由韩国电影《哭声》嘅导演罗泓轸自编自导嘅科幻末日电影《HOPE：逆袭希望港》。
该戏除咗揾嚟黄晸珉同赵寅成之外，仲揾嚟荷里活巨星Michael Fassbender同Alicia Vikander夫妻档参演，成个电影制作规模已经系荷里活高水平，营造咗一个外星生物降临地球嘅好刺激嘅氛围。而有观众睇完之后，发觉里面嘅对白有超过百句粗口，导演就回应话有一半系演员即兴发挥，一半系剧本已经有，仲话佢剪片嘅时候已经cut咗二百句㗎喇，面对住外星生物侵袭，可能除咗爆粗冇其他选择呀！
本身由Andrew Garfield主演嘅蜘蛛侠电影The Amazing Spiderman呢个系列已经好耐无消息㗎喇，但系随住《蜘蛛侠：不战无归》揾返Andrew返嚟，一班蜘蛛粉又再重新集气希望可以有第三集喇。有消息指，Sony Pictures正系积极考虑紧，喺复仇者联盟6完结之后，就会开拍第三集嘅The Amazing Spiderman，不过片名就未必会用返Amazing呢啲字眼，大家可能仲要等多两三年喇。
本周电影新片速递
《HOPE：逆袭希望港》，一处偏远小镇，一则「猛虎出没」消息，离奇事件急速扩散，某种超乎想像嘅可怕生物正逐步逼近。增援无望，通讯中断，居民死守防线嘅同时，深入山林嘅搜寻队却反遭猎杀。异兽进击，小镇警号大响，喺一场关乎生存、信仰同毁灭嘅末世灾难中，到底边个喺度孤军奋战，边个盼望逆袭生天呢？
《巫法闯情关：魔女秘密》，月光之下，魔法苏醒！延续上集剧情，两大金像影后Sandra Bullock同Nicole Kidman化身奥云姊妹，誓要同缠绕家族数代、祸及女儿爱情宿命嘅黑暗诅咒，决一死战。
《我未许愿先吹蜡烛》，澳门女孩同嫲嫲蜗居于旧楼天台，来自台湾嘅落魄青年登门追债不成，反同两嫲孙结交情谊。有日，急需用钱嘅孙女意外执到赌场筹码，并将其交给青年去落注。萍水相逢嘅两人，由此展开一场相亲又相呃嘅老千行动。
《欢迎来龙餐馆》，东北大厨徐福为养家还债，孭住炒镬走去中东一家中餐馆做厨师。佢show出龙抬头、拔丝地瓜、宫保鸡丁等各色中华美食，同前台经理马俊生一个揸镬铲一个吸客，将无人问津嘅龙餐馆经营得风生水起！但系战争突然爆发，当地局势急转直下。乱世之中，各方势力轮番登场，徐福嘅命运将会何去何从？战火中嘅龙餐馆又将如何维系？
香港票房龙虎榜截至9月9号中午，第1位《命悬3000呎》、第2位《蜘蛛侠：英雄重生》、第3位《剧场版CHIIKAWA人鱼岛的秘密》
