钟丽淇（Margaret）今日（11号）惊传病危入院，Margaret淡出幕前多年并转型做瑜珈导师，2010年同混血老公Nardone Ruggero结婚，育有两名女儿。虽然大女Isabella患上罕见基因病「四号染色体缺损综合症」，多年积极面对治疗，一家四口生活幸福。
近日Margaret同出席「七魔女」成员周家蔚生日聚会时，因其身形暴瘦兼且面容呈现僵硬状态，令唔少网民关心佢嘅健康情况，担心Margaret身体抱恙。Margaret好姊妹佘诗曼日前出席活动时，简单回应兼代好友报平安，叫大家唔使担心，称生日会当日Margaret只系流感不适，仲话Margaret有「Doctor Margaret」花名。
今日有报道传Margaret病危入院，被送往中文大学医院深切治疗部（ICU）留医，盛传Margaret遗传妈妈嘅渐冻人症，而且病发已经有一段日子。另有人爆料称见到Margaret闺密梁靖琪喺ICU门外守候。
Nardone代老婆接听传媒查询电话，Nardone透露老婆健康情况OK，但面对有传入院一事，佢支吾其词，仅讲「佢冇嘢喇，OK」便收线。其后Margaret喺社交平台表示收到大家嘅关心，希望尊重佢同家人嘅私隐，唔好揣测佢嘅健康或病情，给予佢哋空间。
