《中年好声音4》季军兼人气王郑家声日前举行粉丝聚会，同一班「爱声人」聚会答谢大家嘅支持同爱戴。家声就话如果唔系有大家嘅支持，喺决赛就入唔到TOP 3。
完成比赛后，家声工作接得密密麻麻，不过佢就抽时间返加拿大。家声因为比赛放低发型师工作好长时间，笑言自己收到好多客人私讯想Book佢剪发，仲有个客为咗等佢，等到由短发变成长头发添！
家声战友陈旭培同范子睿喺呢日有嚟祝贺家声，家声嘅屋企人更加集体出动撑场。尤其决赛前特登由加拿大飞返香港支持阿仔嘅郑爸爸同郑妈妈，见到家声有咁好嘅成绩，佢哋觉得好安慰。两老感谢粉丝对家声嘅支持，亦向家声寄语，希望佢唱多啲好歌俾大家听，好开心家声可以实现梦想。
至于家声就要感谢哥哥完成爸爸期望，有大学学位及成家立室，令佢可以放松做其他嘢。而佢亦形容自己艺术细胞系遗传自妈妈，自己一直得到妈妈支持。