《中年好声音4》赛事圆满结束，当中六位动物歌手「企鹅人」周志康、「狮子王」罗天宇、「猫女郎」刘佩玥（阿Moon）、「白羊君」姚兵、「白眉鹰王」莫家淦同树熊公子「黄建东」一齐作客TVB娱乐新闻台《StarTalk》跟主播许文轩分享参赛点滴，同埋嚟紧开骚嘅准备。
六人以艺人身份参加歌唱比赛，过程难免听到嘲讽声音，阿Moon自爆妈咪将佢参赛嘅片收录喺手机，然后就话佢边啲位唱得唔好。莫家淦就话赛事过程中，佢起到一个哥哥嘅角色，因为好多素人唔识面对批评声音，自己可以去勉励佢哋。
有批评声音，当然会听到鼓励说话，阿康话两名女儿就冇赞佢唱得好听，不过见到佢哋喺录影厂支持自己已经足够，天宇就话每逢有家人朋友喺现场观赛，佢就会好紧张，仲会全程回避同家人朋友有眼神接触。相反姚兵就有一个遗憾，因为家人未捧过佢场，佢期待迟啲开骚时，太太同阿仔入场欣赏。
六人已开始为演唱会备战，东东仲话自己构思特别表演，希望令大家对佢改观，家淦就计划同姚兵劲歌热舞，连阿Moon都期待同姚兵有跳舞演出。讲到大家都期待阿康同哥哥周志文合体演出，阿康指哥哥工作好忙，唔知道哥哥有冇期，问到是否留畀阿文同阿Moon合作？阿Moon话阿文有好多人争，即使佢唔上台演出，都会喺台下观众捧场。