李克勤 星期五晚现身校长 谭咏麟 喺红馆展开嘅世界巡回演唱会—终极篇香港站首场演出，本来于观众席支持嘅克勤，仲被校长即场点名，佢更跨栏登台惊喜上演「左麟右李」合体场面。
校长于台上大爆克勤毫无准备、甚至未戴耳机听唔到拍子情况下「盲唱」，两人合唱经典金曲《朋友》。而克勤就笑言自己唔止系素颜现身，仲于台下同曾志伟一样睇到感动落泪，又感性代表歌迷感谢校长多年来带来无数经典金曲，陪伴大家成长。
除现场力撑老友个唱之外，克勤睇骚前原来出席另一充满温情嘅温馨饭局。佢同1999年一齐参与TVB经典剧《庙街．妈．兄弟》嘅幕后同演员班底聚会，当中包括饰演母亲嘅 黄淑仪 剧中兄弟 梁汉文 以及金牌监制潘嘉德，黄淑仪丈夫 徐景清 同克勤太太 卢淑仪 亦一同出席。
相隔27年再次聚首一堂开心话当年，克勤感叹话：「多么开心的饭局，多么值得珍惜」，梁汉文亦留言笑指「一坐埋唔知点解好有一家人嘅feel」，相片一出亦随即吸引大批网民留言大赞经典。
