黄翠如与萧正楠携阿仔「萧哈哈」喺9月初展开一家三口首次马来西亚外游，佢哋抵达吉隆坡后，随即与翠如闺密吴天瑜（Debbie）一家团聚，哈哈与契哥相处融洽，翠如喺社交平台再次分享幸福家庭照，原来为咗影呢张相，佢同阿萧都付出好大嘅努力。
翠如喺社交平台分享一家三口合照时，感叹称为咗影到一张完美世纪合照，佢哋喺双子塔前，足足影咗接近100张相，先成功挑选出唯一一张最满意成果。相中见翠如抱住哈哈，对住镜头展现无比灿烂嘅笑容，阿萧则展现暖男式微笑，之不过网民焦点落咗喺「萧哈哈」身上，大赞哈哈五官简直完美复制父母最强基因，越大越靓仔。
另一张相见哈哈被妈妈抱起，哈哈好奇指住前方嘅喷泉，翠如眼神充满母爱，今次除咗陪阿仔，翠如同阿萧亦难得「解放双手」过二人世界，二人叹大马地道嘅拉茶同Roti Tissue。
而翠如难得跟好姊妹Debbie相聚，佢哋都结伴去苏丹阿都沙末大厦影闺密照打卡，Debbie亦有陪哈哈玩，二人喺屋企一齐躺喺儿童床倾偈，相中见Debbie牵着哈哈只手，画面极其温馨。
