卫兰 将于11月再踏红馆举行三场演唱会，已开始为个唱准备嘅Janice，喺9月12号晚突然现身湾仔海旁，担任乐队The Flame嘅Busking特别嘉宾，Janice嘅现身顿时吸引大批市民同歌迷围观，见到大家热情嘅反应，Janice当然要用自己把靓声献唱经典代表作回馈畀大家，佢先后同乐队主音 张洁莹 (Kit) 合唱《心乱如麻》同《大哥》，最后再引领全场观众大合唱《就算世界无童话》。
现场高涨热闹嘅气氛，就好似为红馆个唱做咗一次骚前热身，唔少歌迷同观众都将片段上载至社交平台，有人留言形容话偶遇Janice唱Busking，感觉有如置身梦境。而歌迷听到Janice献唱三首代表作之后，即时喺网上留言列出自己想喺红馆度听到嘅心水歌单。
面对歌迷同观众咁热情，Janice相当感动，佢之前提及过，歌迷喺20年前一路陪伴佢走到今日系极之唔简单，途中虽有起跌，但大家始终给予无限支持。Janice会做足准备再精心挑选歌曲，务求为大家打造一份心满意足嘅完美歌单。
