《中年好声音4》当中6位动物歌手「企鹅人」 周志康 「狮子王」 罗天宇 「猫女郎」 刘佩玥 「白羊君」 姚兵 「白眉鹰王」 莫家淦 同「树熊公子」 黄建东 作客《StarTalk》接受主播 许文轩 专访。
嚟紧佢哋将会联手开骚，阿康觉得感觉好似毕业礼，当初佢哋戴面具上台参赛，到今日换转第二个身份上台献唱。阿东收到消息有份参与时，直认系惊讶，因为自己系较早时间出局，冇谂过会有参与演出，相反天宇参赛时就期待呢个骚，唔系佢有预知能力，而系佢当时喺广州睇完阿Moon嘅演唱会，觉得阿Moon好劲，一个人都能够开骚，觉得他日夹埋阿Moon开骚都唔系难事。
回想当初报名参赛时，各人身上都有包袱，天宇话自己系选美出身，报名参加歌唱比赛会有啲尴尬，虽然佢好钟意唱歌，但平时喺屋企家人都唔畀佢唱，佢只可以匿喺浴室度唱。
而参加过唔少歌唱比赛嘅姚兵，直指自己都算系选美出身，因为当年嘅歌唱比赛都系睇样，而佢觉得廿几年前嘅自己都可以的。阿康亦指自己系靠选美出身，因为当年佢参加歌唱比赛时系冇实力，但又唔敢话自己系偶像派，所以今次就以蒙面方式出战，希望畀大家睇到佢实力一面。
至于参加过无数TVB赛事嘅阿东，就话曾经挣扎过一段时间，担心观众觉得又见到佢参赛，不过佢自细就好钟意唱歌，想藉今次机会畀大家知道佢有几钟意唱歌。
