新生代女歌手 KALAI家丽星期一唔止迎接28岁生日，更宣布加盟 陈奕迅 创立嘅音乐厂牌EAS MUSIC，成为旗下首名女歌手。首支派台作品《THAT’S HOW WE MOVE》亦同步推出举行新歌发布会，老板 Eason 亦亲身撑场，分享音乐路心得同送上生日蛋糕同鲜花，见证KALAI踏入全新阶段。
KALAI以Rapper身份出道，但一直喜欢唱歌，过往就经常请教Eason，Eason更曾为佢其中一首作品担任Vocal Producer，令佢获得唔少启发。KALAI又笑指同「陈家」嘅缘分非常有趣，她最初先认识徐濠萦，后来同 陈康堤 成为朋友，之后又有份参与Eason《Fear and Dreams》世界巡回演唱会。
KALAI又曾获 郑秀文 邀请担任巡回演唱会固定表演嘉宾，7月又参与《陈辉阳作品演唱会》同小肥一齐演出。更曾获唔少品牌邀请参与活动。2020年以独立歌手身份出道至今嘅KALAI，一直亲自参与作品曲词创作同制作，已先后推出唔少作品。
呢次发布会KALAI嘅大批圈中好友都到场支持，一齐见证KALAI呢个重要时刻。KALAI一连演绎三首歌曲，包括加盟EAS MUSIC后首支派台作品《THAT’S HOW WE MOVE》。演出后Eason更上台同佢对谈。
KALAI话：「以前好多嘢都系自己处理，而家咁多同事一齐帮手，可以令作品质素再提高，亦可以同更多自己一直想合作嘅音乐人做歌。」仲话Eason同团队给予极大创作自由，唔会改变原本音乐方向。
Eason就提醒佢加入唱片公司之后最重要嘅系保留原有个性：「好多独立歌手签咗Label之后，个感觉可能会有所改变。我希望你一路进化，但唔好唔记得自己，最主要𠮶个core系点，呢样嘢要keep住。」