容天佑最近忙于为TVB处境剧《爱‧回家之三代同糖》开工，今年5月升呢做新手爸爸，早前聘外佣姐姐帮忙照顾爱女「澄澄」，点知外佣姐姐趁容太WInnie离港出差，精心部署走佬，容天佑收工返屋企，已发现外佣姐姐不见踪影！
容太WInnie㖊日喺社交平台晒出一张朦胧嘅合照，相中隐约见到容天佑一家三口同外佣姐姐，WInnie大吐苦水透露自己离港第1日，老公容天佑夜晚11点收工，见外佣姐姐唔喺屋企，幸好WInnie出发前，一早安排爱女去外婆屋企暂住。
容太WInnie即时联络对方，睇吓佢系咪安全冇事，但外佣姐姐已读不回，到第三日终于回复，声称自己一直喺香港，要求等女顾主返港先解释，跟住有另一个香港人拎咗外佣姐姐个电话讲，「hello我喺香港国际机场嘅地勤人员，你姐姐飞咗去某一个地方，但系俾人遣返咗，所以姐姐唔知道依家应该去边」，只好叫外佣姐姐去中介公司度等安排。
其后外佣姐姐透过中介公司要求容太「即刻买机票」，俾佢翌日返回菲律宾，WInnie慨叹而家请工人真系好难，请到好工人真系要好好珍惜，雇主太冇保障，WInnie更发现「File入面嘅合约又唔见埋 ，希望一个月后唔会收到收数公司嘅信啦」，仲话而家先知道原来请一个未嚟过香港嘅外佣姐姐，其实对方都有机会曾经嚟香港打工，对方可以改名、改生日日期，然后可以重新签证嚟香港做嘢。
WInnie同时抱怨呢位外佣姐姐平日工作态度极差与欠缺卫生，忆述外佣姐姐预谋走佬𠮶日，BB房沦为恐怖「蚁窦」情景，「佢个柜入面已经冇乜嘢，净系留咗一杯饮剩嘅咖啡同埋食咗两啖嘅方包摆咗喺台面。当然，佢本身谂住走佬嘅话，我唔会想佢返屋企……佢喺BB房倒泻咗咖啡，冇抹返干净，仲惹到成地都系蚁，所有尿片同其他BB嘢都布满蚁，墙上面同地下已经有渍同埋好臭。基本上所有尿片都唔用得，成间房要反转重新清洁，灭走晒啲蚁」。
