中声歌手 黄博 近日推出今年第二首单曲《花说》，新歌同江晖联手作曲，并由乔星填词，更邀请到大师级资深音乐Ted Lo编曲。歌曲以花朵作为比喻，传递出每位女性就好似唔同嘅花一样，各自拥有独一无二嘅优点、美态以及价值，鼓励女性要自爱自强，勇敢活出属于自己嘅美丽人生。
博博好荣幸新歌拥有呢个豪华制作班底，而喺MV中，佢就以说书人姿态登场，串连三个唔同背景嘅女性，喺大都巿中自强、自我救赎嘅故事。博博更邀请喺剧集《正义女神》反串少年杀人犯「高成彬」而人气急升嘅刘倬昕演出MV：「真系好多谢佢，因为系佢第一个拍嘅MV，中间佢虽然戏份唔算好多，但系佢情绪投入度系好高，好有情感嘅感染力感觉，其实三个故事女主角都演得好好，令到MV故事更加丰富、生动，大家可以加深对歌曲嘅理解。」
新歌用花做主题，原来博博自小已经喺「花园」中长大，因为父母都好钟意花，妈妈亦好钟意买花做摆设。至于要用咩花代表自己？博博就笑言每日都会有唔同：「好似去沙滩拍《花说》MV𠮶日系酷热天气，我就想变咗喺水中嘅睡莲，𠮶日同粉丝搞活动，见到好多粉丝心情好温暖，佢哋出现就好似满天星咁样陪伴我。」
日前博博更喺餐厅举办活动，同粉丝聚会之外更宣传新歌，活动仲有甘永杰帮手担任主持。博博除咗现场演绎新歌，仲亲手以花朵做饮品同甜品俾粉丝品尝，而当日博博准备嘅另一个惊喜，就系公开十几年前嘅工作照，目标就系想呼应MV中嘅故事：「每个喺城巿生活嘅人都会有唔同阶段嘅面貌，想将呢啲唔同感觉嘅相分享畀大家睇吓。」而大家见到博博呢批青涩旧照后，都大赞佢似足高中生，非常年轻。
