吴建豪日前现身北京，参与室内体能耐力赛HYROX赛事，呢项比赛自兴起后吸引无数健身爱好者参与，但喺9月12号赛事就有一位澳洲籍女参赛者Joanna Wietrzyk喺比赛过程失禁，但Joanna仍然「粪勇向前」，最终夺冠。
但由于Joanna嘅排泄物沾污场地同器材，令唔少人都为其他参赛者担心，更有唔少人都误以为VanNess系12号参赛，所以都纷纷涌入VanNess嘅社交平台留言「不知道他踩到了没」、「没被弄到吧」、「屎到临头」，但VanNess其实系14号先参赛，而且主办单位已彻底清洁场地，并消毒所有器材。
VanNess同队友最终以1小时11分53秒完赛，佢仲喺社交平台分享多张爆肌参赛相，唔少粉丝都赞有高度自律性，即使已经48岁但仍然维持到最佳体态。而VanNess亦曾经分享，去年10月听到李玖哲、瘦子等朋友讲起呢个健身赛而引起佢好奇。第一次训练后嘅强度令佢印象深刻，亦开始研究各个项目嘅技巧，最后决心参赛。VanNess仲话，自己膝头有旧伤，需要持续复健，加上进行紧巡回演唱会，要兼顾工作同训练，都用咗唔少时间，最后只系练咗3个月，以完成比赛为目标。
