前组合Cookies嘅不和风波传足咁多年，近日傅颖（现名：傅宝谊）重提昔日被旧队友孤立，更遭邓丽欣（Stephy）圈外好友喺网上公开批评佢「天生唔识同人社交又高敏，冇朋友都要好好学下同人沟通。」即使Stephy事后公开回应，表明朋友言论不代表自己立场，划清界线之外亦代友道歉，但九饼之间嘅是非亦再度成为网上热话。
而Stephy近日喺社交平台分享自己嘅健身片，配文仲话：「做尖片，通常都紧系剪d好似做得好好果d啦。而硬撑完最后一下果种难以自控，你明唔明？今次真系相由心生，你睇我个样几狰狞。同教练讲数嘅重要性，不如8下算啦好嘛。礼貌而不失优雅的微笑，大大力饮水」
帖文一出，唔少人都质疑Stephy写「相由心生」、「不如8下算啦好嘛。」、「礼貌而不失优雅的微笑。」系句句有骨，疑忿忿不平有所隐喻，引发网民洗版式留言，认为Stephy神情气质大变，仲话「你越嚟越似区文诗。」、「真系好似区文诗化咗。」、「睇完好难唔信你冇欺凌。」亦有人翻出杨爱瑾过去接受电台访问时嘅片段，当年Miki大方承认同Stephy、吴雨霏排挤过Theresa，所以大家宜家再睇返Stephy呢个Post，都更倾向认为佢系别有喻意。
