洪卓立 同 许靖韵 日前分别喺东莞举行音乐会，两位呢次唔只落台同观众握手近距离互动，更大派福利为幸运儿观众送上亲手制作嘅花灯，现场气氛热闹又温馨。
Angela今次带新歌到东莞演出，原来呢首歌系喺开骚前一个星期先录，佢都好感谢公司支持以及同事帮手赶工，至嚟得切喺东莞开骚唱俾大家听。Angela表示：「我每次都会搏尽，当每次都系最后一次。」充份表达出佢对舞台嘅认真。
而阿Ken就自爆骚前喺屋企闭关沉淀咗十日，期间谢绝打扰，务求以最佳状态示人，佢解释：「我唔想斋唱，而系想将每只歌嘅故仔分享俾大家听。虽然新歌赶唔切今场，但期待Part 2可以带多啲新歌俾大家。」
巡回音乐会东莞站完结后，佢哋就会正式进入小休息期，仲话期待2027年Part 2带嚟更多新作品俾观众，请大家拭目以待。
至于今次嘅送花灯环节，原来有段故！两位上次去到东莞宣传期间，就去咗一间非物质文化遗产嘅老店，学习制作花灯，更各自整咗一个俾幸运观众。呢份心思唔只应节，更有满满诚意，令大家都好受落。