参加《声梦》出道嘅 潘静文 最近推出新歌《遗憾还是会完》，早前Sherman更现身粉丝喺茶饮店举办嘅宣传应援活动，忙里偷闲同大家见面。不过粉丝俾Sherman嘅惊喜陆续有嚟，佢哋喺铁路站租用大型广告灯箱，Sherman都特登去打卡，仲喺限时动态提醒粉丝要把握时间去影相。
除咗歌手身份，Sherman呢段时间都忙于拍摄处境剧《爱．回家之三代同糖》，佢所饰演嘅社恐秘书「莫希灵」一登场已经凭神似动画电影人物「阿愁」嘅造型备受观众关注，加上佢将细胆社恐演绎得淋漓尽致，所以都令角色好受观众欢迎。
但Sherman喺社交平台分享拍摄花絮，仲留低一句：「希灵好似又准备辞职」令人想入非非，但喺9月15号播出嘅第27集《最佳秘书》中揭晓答案！剧情发展到吴若希饰演嘅唐万里想借莫希灵之手「借刀杀人」，清除由赵浚承饰演嘅杨帆，再炒埋莫希灵，不过结果出乎意料，希灵唔只有得留低，仲得到唐万里欣赏呀！
《爱．回家之三代同糖》星期一至五晚 20:00 翡翠台