新剧改变自法国小说《危险关系》，荷里活曾经翻拍成电影，03年韩国亦有 裴勇俊 同 全度妍 翻拍嘅电影版本，今次系第一次改编成剧集。而孙艺珍、池昌旭同NANA将会上演一段禁忌三角恋。
孙艺珍话因为电影关系，画面仍然留喺佢脑海之中，而呢次以电视剧方式呈现故事，每个角色嘅故事都会更详细展现﹐对演员而言可能系一个更有野心嘅媒介。而随故事脉络逐渐累积，角色亦变得唔再单一，而且男女主角间心理战、以及对女二号嘅睇法亦变得好微妙。
池昌旭过往都演出过大尺度剧集，今次同两位唔同类型嘅靓女合作，大家都好期待佢哋三位究竟会擦出咩火花。佢就话，原著小说入面表达嘅人与人之间感情同关怀都非常有趣，而家会透过电视剧方式制作觉得好有趣，亦好期待同导演以及两位女演员合作，而且同两位风格唔一样嘅女演员一齐演戏，都系一个有趣嘅经验，所以先会接呢套剧。
池昌旭除咗忙新剧宣传，亦飞到台湾出席代言活动。活动当日人潮逼爆现场，连天桥都企满人，场面墟冚，而池昌旭亦冇令大家失望，握手、比心心有求必应，令粉丝觉得好满足。