「慈善女皇」 赵曾学韫 一向对行善不遗余力，嚟紧佢将会举行一个慈善展览，展出约80尊由名人、艺人同艺术家创作嘅彩绘象雕塑。赵太更邀请佘诗曼、肥妈、温碧霞、车婉婉等艺人，发挥佢哋嘅艺术天份，创作独一无二嘅作品。
Maria Cordero就分享自己嘅创作灵感，系源于自己最爱嘅大家庭，所以佢选择唔用髹油，拣用17个唔同嘅喜字去画，加上自己，一共有18个喜字喺大象身上。
呢次Irene为一大一细嘅吉祥象画上心形、蝴蝶同昆虫等正能量嘅图案，Irene话赵太乐于行善嘅精神，绝对深深影响自己，而且可以帮人系一件好开心嘅事，向需要爱嘅人付出爱，亦好有满足感。至于赵太就介绍话，展览嘅构思灵感已经喺两年前有一个雏型，大象代表爸爸妈妈，系赚钱吸水能力，而小象要识得花钱。因为以前嘅谂法都系老人家勤力揾钱，都系只为养家。
婉婉同赵太相识多年，佢话好敬佩赵太多年嚟不遗余力推动各项慈善工作。婉婉分享嘅设计灵感源于想为大家送上暖意同甜意，就好似佢所拍摄嘅处境剧《爱．回家之三代同糖》一样，所以画咗好多唔同嘅糖果喺象身上。
