鼎爷 李家鼎 嘅前妻 施明 今年三月病逝，事后鼎爷指控大孖 李泳汉 隐瞒施明死讯兼长期苛索金钱，之后更独揽施明身后事处理大权，拒绝透露施明安葬地点，令见唔到施明最后一面嘅鼎爷同细孖 李泳豪 伤心欲绝，更因而同大孖正式决裂，心力交瘁嘅鼎爷更因此暴瘦，健康情况令人担忧。
事隔半年事情终于有转机，豪仔于18号喺社交平台上载咗一张同母亲施明嘅旧照，透露喺热心人士协助下，经已成功揾到施明骨灰安葬地，已完成上位仪式。豪仔写道：「感谢在这些日子里有很多热心、善心人的帮忙，在他们关怀及协助下终于找到我妈妈的骨灰位并确实在今早已上位，衷心感谢你们，无言感激。」
施明终于入土为安，鼎爷同豪仔总算可以放下心头大石。同日鼎爷返电视城开工，见佢肥返啲，精神状态都唔错，对于施明已完成上位仪式，鼎爷亦亲证属实，但就表示唔想多作回应。
鼎爷回复元气，豪仔两公婆功不可没，无论衣食住行都照顾周到，鼎爷话细仔同细新抱好紧张，除咗照顾饮食，又叮嘱佢做运动，唔好成日坐同瞓。见鼎爷讲嘢中气十足，相信观众都好希望可以见到佢再揸镬铲，继续教大家煮好𩠌，鼎爷 表示只要有通告，就会继续工作，甚至连拍剧都冇问题，只要唔好夜接早咁拍就得。
