郑俊弘 同 何雁诗 早前将患有罕见病「天使综合症」嘅4岁囝囝 郑赞廷（Asher）送往加拿大生活，交由长辈照顾，而两人就轮流赴当地照顾囝囝。报道一出，随即惹嚟网民狠批，质疑佢哋「弃养」Asher，加上何雁诗之后又上载咗一张喺豪宅打麻雀嘅相片，表现得好写意，因而令网民更加反感，批评佢只顾玩乐，放弃理会囝囝。
日前Fred接受已移居加拿大嘅《东张西望》前主持 容羡媛 网上频道访问，Fred首度开腔回应呢场弃养风波，首先佢表示自己无留意任何有关嘅报道，亦都唔想回应被指「弃养」一事，佢只系话安排囝囝移居加国，主要系因为当地嘅医院设有「天使综合症诊所」，医疗上可以更配合囝囝嘅需要，加上医生同治疗师对呢个病好有经验，所以佢哋两夫妻先作出呢个重大决定。
Fred又透露Asher喺今年6月已移居加国，9月亦正式入读当地嘅特殊学校，佢表示学校共融嘅学习环境，令囝囝好快适应新生活。 对于Asher而家其实好需要父母喺身边，佢哋点样分隔两地去照顾时，Fred就表示自己而家工作上算系自由身，所以照顾Asher上会更有弹性，而呢次亦会逼留喺加国较长时间，仲同太太大派定心丸：「你唔驶担心，呢度有我喺度照顾到阿仔，你请到假咪即刻飞返嚟，我哋可以一家人一齐。」至于有无谂过喺加国长期工作？Fred就表示有谂过修读音乐治疗课程，既可以帮到囝囝，又可以多啲留喺当地陪伴。
访问出街后，唔少网民都留言表示支持Fred，并大赞Fred绝对系好爸爸，而另一边厢，正喺香港工作嘅何雁诗，喺出席活动时，亦就近日嘅风波开腔回应，佢表示放打麻雀相上网，只系分享自己正常社交生活，无谂过会惹嚟批评，而佢亦强调自己事事以囝囝为先，至于被指「弃养」，佢就表示唔系真实，亦唔知点解释，总之自己一定唔系放弃儿子。
