古天乐 旗下嘅舞台制作单位「天下一幕」早前推出嘅头炮剧目《大龙凤》叫好叫座，近日宣布全新作品《Rabbit Hole 心涡》登场，演出阵容包含剧场、影坛实力派同新生代演员 张继聪 韦罗莎 余安安 以及两位瞩目新人 谭旻萱 同 罗文泽 ，幕后班底同样丰富，更由资深剧场导演；韦罗莎丈夫张铭耀执导，带领观众直面人生嘅失落与重生。
《Rabbit Hole 心涡》曾荣获美国百老汇最高殊荣「普立兹戏剧奖」，亦曾被奥斯卡影后妮歌洁曼改编监制同主演同名卖座电影。剧目将于明年1月8日起假艺术中心寿臣剧场公演。门票将会星期二中午开售。
张继聪早前为《大龙凤》担任监制，今次于《Rabbit Hole 心涡》就身兼监制同男主角，阿聪话解释：「上次系喜剧，呢个系正剧，有少少温暖，主题讲家庭、失去，可以话系我出道以来其中一个难度最高嘅剧本，好有挑战性，加上每个角色都写得好好，作为演员确实无可抗拒，好期待！」
佢仲话由Rosa担纲女主角系最佳选择：「一个出色剧本需要非常有实力嘅演员，无论剧界定电影圈，Rosa都系公认好演员，加上导演German同Rosa，咁多年来由同学到夫妻一直好有默契，同佢哋合作，我可以放一万个心。」
导演German表示故事聚焦主角一家面对至亲离开嘅情感角力，牵涉唔同拗撬、后悔等，女主角Rosa透露：「最大挑战系好多对白，角色又有好多层次，要尽量演出自然，不能太过火去演绎呢个悲痛角色，必须同对手好有默契，真系唔容易！」今次同导演老公German一直合作无间，Rosa笑指：「其他演员收工后就可以休息，我返屋企就继续要面对导演，但好多时排咗成日，返屋企彼此俾啲空间大家。」
余安安继多年前《仲夏夜之梦》后再踏台板，佢指：「剧本非常好，相信个个演员都好想参演，我觉得好幸福，希望可以擦出火花。」剧中佢扮演Rosa同Mandy嘅妈妈，表面精灵就带啲傻气，本来好爱惜两个女，但用咗错误方法，为Rosa带来二度伤害。」
安安姐嘅好女婿阿聪，记者会上被要求完成多个唔同任务，好似即场向老板古天乐传短讯要求加人工，事后佢话：「莫讲要加人工，而家我攞咗老板一大笔钱，佢咁信我专业判断，感觉好大责任，希望不蚀本就好喇！」
Mandy抱病出席专业精神可嘉，首次参演舞台剧嘅Mandy直言心情紧张：「我要努力背熟自己同对手全部对白，希望万无一失！我同角色性格有啲似，导演叫我放胆演，对手点都会接得住，所以我开心多过惊。」