日前被正于红馆开骚嘅好友 谭咏麟 笑指切完烧猪就唔见咗人嘅 钟镇涛 ，原来已飞往大马再到云顶举行演唱会。去年B哥哥就曾于当地举行《及时行乐》巡回演唱会首站，当晚全场观众由头到尾一直同B哥哥大合唱，主办单位有见气氛热烈，于是再度邀请B哥哥再度重临云顶举行个唱。
今次佢再度带同两位心爱千金 钟懿 同 钟帼 同踏舞台，三父女再度展现音乐默契，歌迷亦继续全场大合唱，一家人与观众提前开心迎中秋。
演唱会期间，Blythe于观众面前，现场演绎佢人生第一首粤语单曲《To Leslie with Love》，向近日 70 岁诞辰嘅一代巨星「哥哥」张国荣致敬。Blythe又感性话虽然自己从未亲眼同哥哥见过面，但「张国荣」对佢一啲都唔陌生。佢话：「因为爹哋嘅关系，屋企经常会播起哥哥嘅歌。佢嘅音乐、电影，其实一直都陪伴我长大。」
Blythe又话：「我觉得非常荣幸可以唱到呢首歌，呢首歌嘅歌词全部系用咗Uncle Leslie过往嘅歌名同歌词去创作，系好有纪念意义嘅一首歌。」钟懿呢晚亦特别献唱电影《给阿嬷的情书》嘅主题曲《月下煮茶》，首次挑战唱潮汕语，事前更特别苦练。
B哥哥亦现场演译「鬼马词人」黎彼得嘅两首名曲《玩吓啦》同《浪子心声》，B哥哥又分享Pater哥嘅过往：「黎彼得年轻时有另一个笔名叫柴可夫，因为佢系做司机嘅，而佢同许冠杰合作之前，其实系同温拿合作，当时我哋温拿有个节目需要主题曲，结果就揾咗陈友呢位「柴可夫」朋友帮我哋作咗头一段，然之后由沾叔就完成埋，就成为咗呢首《玩吓啦》。」
黎彼得因为呢首无心插柳嘅「作品」，之后由司机变成一位填词人，更同歌神许冠杰合作创作大量脍炙人口嘅经典金曲。对呢位作品丰硕嘅填词人离世，B哥哥觉得非常惋惜，所以特别于演唱会中缅怀佢嘅经典作品。