郑秀文 Sammi 日前于尖沙咀举行 LP 签名会，签名会正式开始前Sammi先同大家玩游戏做热身，期间台上一位女歌迷突然冲上前拥抱Sammi并落泪，工作人员见状即上前解围；而另一位女歌迷亦上前拥抱并喜极而泣，引来台下阵阵起哄。向来宠粉嘅Sammi，最终与主持Donald合力「出猫」，令四位参与游戏嘅fans都可将获得同佢单独合照嘅机会。
为答谢大会提供场地及赞助，Sammi特意准备咗亲笔签名嘅全新黑胶LP率先送给华人置业集团行政总裁兼执行董事刘陈凯韵（刘太）。而刘太则回赠亲手织嘅黑胶碟造型斜孭袋和小手袋畀Sammi，对于呢份咁有温度嘅手作礼物，Sammi爱不释手。
提到今次嘅LP创作与设计理念，Sammi 表示：「全部歌都系我亲自挑选，当中有side track，全部都好代表到𠮶个年代嘅Sammi。我用『初』字，想将音乐去返最『初』，我嘅原点。字上面有几块叶嘅构思都系我谂，树木嘅成长从幼苗开始。其实就个『初』字，我都花咗好多心机。」
相隔8年再搞签名会，世界各地歌迷都赶赴现场见偶像，唔少人仲一见到Sammi就忍唔住喊。对于今次签名名额只得600个，Sammi表示好唔够：「除咗香港嘅歌迷，仲有好多来自世界各地嘅歌迷，有啲要搭飞机、长途车，我真系好感动呀！呢种来自心底里好真诚嘅支持同渴望，我会格外珍惜，会做多啲好嘅歌回馈俾佢哋。」
中秋将到澳门演出，之后就要启程到外国工作，行程相当紧密。至于早前Sammi曾透露「三米饭团」（歌迷会名称）今年内会再办聚会一事，佢就话正积极筹备中，会喺适当时候公布详情。
