校长 谭咏麟 共10场嘅红馆演唱会，第8场于20号举行，当晚吸引到文化体育及旅游局局长罗淑佩、林子祥及叶蒨文、狄波拉、刘天兰、黎瑞恩、邵美琪、孙耀威及太太陈美诗、江美仪、姜皓文殷宁夫妇、邓建明、谭辉智、梁浩贤及李金凯等到场欣赏。
演唱会由「无言感激篇」到「情不变篇」，都设有「苍海遗珠」环节，每晚都准备咗三首唔同嘅歌畀歌迷即场选择，而呢晚分别系《情缘巴士站》、《我的生命我的爱》及《相识非偶然》。
最终校长率先唱出欢呼声最高嘅《相识非偶然》，但唱完呢首后，对于歌迷嘅要求佢都有求必应，校长仲畀歌迷感动到眼湿湿。而当唱到《朋友》一曲时，校长未递咪，全场过万观众已接住开口唱，再次感动到校长，所以唱到尾声时，校长就忍唔住将歌词改为「系我今世嘅好朋友」，之后仲不禁流下男儿泪呀。
