江美仪联同吴业坤、张振朗同曾展望（GM）呢日现身TVB节目《试真D唷》商场见面会，四位主持大跳节目主题曲舞，而活动当日系美仪姐正日生日，大家好有心为佢庆祝生日，坤哥仲解释屎型蛋糕寓意。
美仪姐叹气话唔知点解生日要「食屎」，坤哥话系试真D「视」后，条「视」系好长！而美仪姐今年生日愿望系《试真D唷》收视好，长做长有，每年生日都系《试真D》系列播出街嘅时间。
《试真D》由第一辑开始，已获唔同年龄层嘅观众捧场，早前一众主持走入校园，同一众学生互动。振朗话今辑拍𠮶阵冇谂收视系点，大家尽量试吓，节目收视理想，佢哋都好满意，美仪姐觉得万事起头难，咁开播以嚟收视几好，希望个势可以保持落去。
美仪姐、振朗同坤哥喺最新一集试食温体羊，仲有得食特别嘅羊部位，振朗亦难忘呢次体验，自己以后都唔会试食呢几样嘢，坤哥就赞温体羊系好食。美仪姐话每集有好食同唔好食嘅嘢，GM之前食过猪眼、猪袋、猪三叉神经、猪胎盘同BB睪丸，美仪姐赞GM好坚，仲话振朗系输㗎！
《试真D唷》星期日晚 20:00 翡翠台