转战演艺圈嘅「羽毛球王子」 江博熙 近日首次同只得16岁嘅亲细佬 江柏熙 「合体」，为服装品牌拍摄宣传片。两兄弟同框亮相骚俊俏一面，不过幕后就擦出唔少搞笑火花，仲为拍摄现场增添唔少欢乐气氛。
Hei呢次同「细细佬」一齐参与工作，仲话要平分酬劳，更加话妈妈生日在即，兄弟会合送新手机做生日礼物孝敬母亲。
「细细佬」Tony仍系中学生，同时亦系排球运动员，今次初面对镜头拍宣传片，亦坦言心情难免紧张喇：「阿哥经验比较丰富，拍摄前叫我早啲瞓觉休息，同埋教我影相摆Pose，展现自信。」佢哋仲喺镜头前互喂薯片，又复刻童年照，画面非常有趣。
Tony又指有哥哥同场所以好快就放松，拍摄亦越来越投入。而Hei对呢次难得合作就话：「真系从来无谂过会一齐拍广告，感觉好得意，佢好叻、好淡定。10分满分有7分。我就有7.5分，高佢少少！」
原来呢次兄弟档演出，系因为Hei希望呈现温馨又舒适嘅亲密感，于是主动提议叫细佬参与拍摄，不过就要Hei话：「第一时间问妈咪，佢好爽快就答应，大家都觉得难得有呢个机会，制造一个特别嘅回忆。」拍摄当日父母亦在场支持。
当提到Tony会否正式入行时，佢就话：「佢年纪仲细，现阶段最重要任务系专心读书，同时好好发展排球运动员生涯。」仲话兄弟俩平时会一齐做运动同跑步，又展望未来有机会再接拍家庭用品广告。