泰国新生代女演员Lookmhee与拍档Sonya主演GL剧深受粉丝喜爱，常受邀举办海外粉丝见面会，日前佢哋作客TVB娱乐新闻台《StarTalk》访问，二人嚟香港好多次，Sonya赞食物非常好食，二人好钟意食街头小食，并介绍新剧《乡村罗曼史》。
Lookmhee与Sonya主演嘅喜剧已于myTV SUPER 平台上架，免费开放给香港同澳门观众睇，Sonya觉得呢套剧有一种趣味同喜感，Lookmhee话二人以前多数演正剧，今次可以带喜剧风格畀粉丝，佢哋都好开心。
Lookmhee觉得呢次最大挑战系开工每日要同动物相处，Sonya话一开始要系咁晒太阳有啲唔习惯，而家都惯晒，但自己就用咗好长时间进行晒后皮肤修护。
《乡村罗曼史》讲千金大小姐 Si 为咗拯救家族生意，被迫答应与乡下女地主 Klao 结婚，以换取一份重要嘅土地租约，二人生活方式截然不同，却要喺同一屋簷下生活，原来只系利益交换嘅婚姻，后嚟变成一场爆笑又甜蜜嘅爱情故事。
Lookmhee与Sonya自2024年拍剧集《爱情诡计》后，呢次系佢哋第三次合作，Lookmhee觉得二人演亲密戏时有更多信任，一齐演出更安心，Lookmhee话完全系靠二人默契，彼此一拍即合，然后就顺住剧本发展落去，二人仲选出剧集最难忘场口添！