羊年贺岁电影《食住上》日前举行开镜拜神仪式，新作由 蔡卓妍 、林峰 领衔主演，加上朱栢康 胡定欣 许恩怡 梁雍婷 女团VIVA，同李靖筠 陈海儿 何佩瑜 杨天宇 洪助升 等参与，电影公司更指更多强劲卡士尚未曝光。
电影公司老板 杨受成 率领一众星级演员出席开镜礼，齐心祈求拍摄顺利，仲话希望新年为观众献上一部充满欢笑、人情味同视觉美味嘅开心大作。 新片顾名思义同「食」有关，阿Sa指今次将会饰演一位字字珠玑、作风辛辣嘅顶级食评，将会同林峰饰演嘅厨师碰撞出唔少火花。二人仲特别为电影上堂学习烹饪技巧，席间阿峰仲大显身手，主动切烧猪分发俾大家。 阿Sa接受访问时率先讲：「我两年前已经听过呢个故事，导演有提过当中有个角色好适合我，仲同『食』有关，我觉得真系非常适合，所以一直都非常期待呢个角色。」再次参演贺岁片嘅佢认为农历新年最紧要开心，人开心来年就会过得好吉利喇。
林峰亦非常同意呢个谂法，佢仲话：「唔止观众开心，我哋拍摄过程中都好开心。因为我哋演员众多，戏中仲有好多插曲。」阿峰仲话开拍前已非常期待：「因为对上一次演厨师已系廿几年前。当时真系要学中式抛镬，呢次Fusion啲，唔使抛太重嘅镬，不过都有好多新技巧要学习。」
除男、女主角外，今次演员阵容亦非常新鲜，好似饰演阿Sa天敌、於戏中处处针锋相对嘅 朱栢康；而 胡定欣 就饰演在公在私都同阿Sa拍住上、作风沉稳嘅闺蜜兼经理人；仲有造型耳目一新、饰演摄影师嘅 何启华 。
此外，电影仲有一众备受瞩目嘅新生代同实力派演员加入。而导演罗耀辉就话：「『食』系每逢过农历新年最核心嘅灵魂，无论过去一年顺流逆流，一家人坐定定、齐齐整整食餐好，就系最大幸福。新戏就系希望在充满喜庆嘅贺岁档，透过大银幕为观众传递正能量。」
