每年中秋节 罗启豪 嘅歌迷会都会同社企合作推出月饼，今年亦都唔例外，为咗表达心意，今年启豪早已订购唔少礼篮，陆续送到唔同前辈同朋友手上，并亲手写上祝福。
启豪话：「我比较慢热内向，唔会主动打开话题，平时睇到一班前辈，虽然保持礼貌与笑容，但难免会令大家觉得我好似好怕丑，因为我唔擅长同人热烈攀谈，但其实内心有满腔谢意。」
至于嚟紧嘅工作安排，启豪表示佢将会第二次参与「黑暗中对话」慈善演唱会，为增添新意，启豪仲邀请咗三位中声好兄弟一齐参与，包括 刘威煌 颜志恒 同 梁浩贤 ，每场由启豪同其中一位兄弟各自担纲半场，当然唔少得合唱环节。
启豪笑言，其实喺完全黑暗嘅环境唱歌，有一种与别不同嘅享受：「平时舞台上有好多视觉效果，观众亦会留意我嘅样、表情、动作同台风，但喺漆黑之中，大家唔会分心，『被迫』专心听我唱歌，我其实『暗哑底』几钟意㗎！加上我嘅好兄弟都有一把好声音，相信无论兄弟或粉丝，都会分外享受呢种形式嘅音乐会。」
至于演出曲目与内容，启豪为保神秘感，暂时唔想公布太多，佢透露个中玄机：「今次除咗唱歌之外，仲会安排唔少有别于一般演唱会嘅互动环节，我觉得入场嘅观众应该会玩得好开心，亦会有一啲意想唔到嘅体验。」
