由内地同香港合拍嘅犯罪题材三级片《空枪》呢日喺香港举行戏院见面会，几位主演朱一龙、卫诗雅、李施嬅、袁富华、唐文龙、张松枝，联同导演韩延等齐齐出席，几位演员仲向在场影迷派菠萝包贺中秋，气氛温馨又热闹。
朱一龙今次喺戏中唔止要讲广东话对白，仲要唱广东歌氹Michelle，可惜最后相关内容被导演剪走晒，呢日朱一龙喺见面会就应在场观众要求，即场对住Michelle清唱《分分钟需要你》，原来Michelle老公都喺现场，搞到朱一龙好尴尬。
而Michelle对朱一龙嘅评价好高，逢人就赞佢又靓仔又好戏，搞到老公有啲呷醋，仲主动追问Michelle同朱一龙有冇亲热戏，认真搞笑。
李施嬅今次就同另一位内地人气男星檀健次有好多对手戏，讲到印象最深刻嘅场口，施嬅就话系正式开拍前，大家素颜相见嘅一刻，施嬅话自己因为眼睛做过手术，所以冇信心素颜，但喺导演鼓励下冲破心理关口，佢仲搞笑自封系「素颜三级女星」。
