许冠文（Michael）于电影《破。地狱》中饰演看透生死嘅喃呒师傅，现实中嘅Michael亦豁达面对生死话题，佢于香港电台、中国香港移植运动协会（HKTSA）及香港移植学会合作嘅节目《移植新突破》中，罕有谈及器官捐赠、生死观及自己嘅身后安排，更坦言早已与太太及子女讲过自己嘅意愿。
唔少传统嘅华人，都希望「保留全尸」而抗拒器官捐赠，不过Michael就对呢件事有另一个睇法，佢喺节目中表示：「譬如捐赠你嘅器官，你可以嘅话就捐畀人哋，自己都冇用𠮶时，你都自己要霸住，仲要全尸。有咩需要全尸呢？」
而另一位嘉宾邝美云（Cally），亦喺节目中忆述自己10岁开始照顾患上血癌及乳癌母亲嘅经历，佢分享有次妈妈突然呕吐，虽然被妈妈搞到成身都系，但佢都先安慰好对方，帮妈妈清理干净后先处理自己。Cally直言呢段童年经历，令佢深深明白到照顾病人，除咗系生活上嘅照料外，家人嘅态度与陪伴都同样重要。
今年获委任为「器官捐赠宣传大使」嘅 王郑浚仁（Rax），曾因患病而无法正常说话及唱歌，今次参与《移植新突破》中「面孔移植」一集，坦言大开眼界，Rax更表示希望藉宣传大使身份，令更多人认识及关注器官捐赠。
节目共13集，透过医疗专家、不同界别嘉宾及生命故事，带领公众重新认识移植医学的发展，并推广器官捐赠讯息。节目邀请到 许冠文、邝美云、前医院管理局主席胡定旭、胡兆康、张可坚、刘倩婷、李丞责、黄锦山、释常霖法师、李金凯，以及「器官捐赠推广大使」王郑浚仁等嘉宾，至于星级主持则包括车淑梅、廖安丽、方健仪、关心妍、邓慧诗及冯加信医生。
