颜米羔 入行后推出第三首单曲《子虚鸟有》，近日佢接受《StartTalk》访问，同主播 许文轩 道出呢首歌嘅由来。
《子虚鸟有》嘅作曲人系曾经编写名曲《为你钟情》嘅作曲家 王正宇 ，米羔知道后受宠若惊，忆起当日喺演唱会上结织王太后，到自己开骚前得知王正宇为佢写咗首新歌，于是就狂听，揾到一个方法去演绎，以为自己嘅方式会成功，点知被指哭腔太重，再经多次改良同调节得出现时效果，亦系难得见到米羔嘅轻柔一面。
新歌MV由米羔自编自导主理，佢笑言可以悭钱，但过程就令佢好攰，加上拍摄时男主同导演嘅角色转换，搞到佢表情管理增添难度，经常要提醒自己放松肌肉，唔好愁眉深锁。
由幕后走到幕前，米羔坦言曾经承受好大压力，幸好身边都有同路人支持，而佢眼见嘅例子邓丽欣亦曾经负面新闻不断，但佢就处之泰然，最初仲以为佢扮无事，但原来佢抗压力好高，同Stephy合作相处时觉得佢系个邻家女孩好好人，所以心里都好多问号。
米羔又忆起入行前做摄影师时，有次一个婚宴上同新人及台下宾客都相识，竟然踏上小舞台上唱歌被柴台掟筷子，当时都好唔开心，自问唱歌系咪咁差？但当刻米羔并没有停下，反而继续唱，警醒自己要更努力创出成就。
讲到同妈妈嘅关系米羔更不禁感触落泪，米羔一向都最著重妈妈感受，形容自己由细到大都「不知所谓」，而参加《中年好声音》获奖就成为最大成就，可以俾妈咪睇到佢喺电视机上攞一次奖，深刻记得落台后佢不顾一切就冲向妈咪身边分享喜悦。米羔并多谢米粉同行，希望唔会令每一位为佢呐喊过嘅人失望，又应承会多啲见妈咪饮汤。