郭富城日前公布将喺启德体育园主场馆举行跨年演唱会，城城近日忙于完成巡唱深圳站，佢全心投入工作之余，仲好爱锡妻女，安排方媛（Moka）同两位宝贝女于6月26号到场捧场，喺每场演唱会嘅全场互动「Battle」环节，城城即兴点名大女郭咏希（Chantelle）、次女郭咏萱（Charlotte）演出，为现场观众带嚟惊喜，而爱妻方媛今日喺社交平台亦晒出细女郭咏心（Cheryl）嘅跳舞片：「3宝也来挑战鲨鱼舞了👋👋👋」
城城一向对爱女非常保护，两位千金出席公众场合常戴太阳眼镜遮样，呢次佢睇爸爸开骚，二人着爸爸演唱会嘅周边衣服，罕有晒靓样，城城爱女五官精致，爸爸喺台上挑选幸运儿跳改编版「鲨鱼舞」时，点名两位女儿晒舞技，萤幕镜头即锁定观众席，影住方媛同两名爱女随即音乐响起。
城城两位宝贝女跟随节奏起舞，流畅舒展、节奏精准，对舞步非常熟练，二人做出城城招牌抬腿动作作结，全场报以掌声，大女主动向观众鞠躬致谢。
城城眼见宝贝女表现出色，佢亦感到好骄傲，向爱女竖起拇指，更一脸自豪称系爱女自学，唔少网民赞舞王两个女儿好会跳、好厉害，好有爸爸嘅风范。
此外，方媛今日喺社交平台罕有晒细女侧面嘅影片，见细女一头浓密乌黑嘅短发、戴上精致发夹，正在开心地跳舞，细女白皙皮肤，脸颊圆嘟嘟，拥有浓密睫毛，非常可爱。
