为纪念哥哥 张国荣 嘅70岁冥寿，将推出哥哥喺廿多年前录制，但一直未正式发行嘅国语遗作《爱情小孩》。呢首歌由当年与哥哥合作无间嘅音乐监制 梁荣骏（Alvin）亲自操刀重制，并以最高规格制作，让哥哥珍贵动人嘅原声再次重现人前。
呢首《爱情小孩》系哥哥经典作品《春夏秋冬》嘅国语版本，监制梁荣骏透露当年未有推出嘅原因，系觉得原版嘅编曲未达理想标准，直到近年以全新角度审视，再次被哥哥嘅歌声打动，所以决定趁哥哥70冥寿呢个特殊时刻，让呢首作品问世。
制作团队远赴欧洲及澳洲，邀请捷克布拉格管弦乐团，以全真乐器伴奏、意大利大师级音乐人负责编曲，并于澳洲完成混音。Alvin表示：「制作过程充满心思，透过管弦乐团伴随哥哥歌声的情感起伏同步演奏，仿佛 Leslie 站在现场舞台上，与整个乐团即时呼应。」
呢次特别收录咗两个版本，除咗哥哥原唱嘅《爱情小孩》外，亦收录由香港大师级钢琴家 Ted Lo 演绎嘅纯钢琴演奏版《春夏秋冬 Rhythm of Life》。而喺视觉呈现上，封面则采用哥哥生前亲自挑选，并认可嘅经典菲林照片，展现出佢独有嘅华丽与神秘气质；海报及装帧设计则由曾为哥哥设计唱片，并屡获殊荣嘅御用设计师 Kenneth To 操刀。
Alvin表示与哥哥结缘于专辑《Virgin Snow》，其后获邀监制《侧面》大碟，从此展开长远嘅合作关系，亦成为佢音乐生涯嘅重要转捩点，Alvin希望透过今次全新制作，让广大乐迷喺哥哥70冥寿之际，再次感受到佢永恒不灭嘅艺术生命力。
