王丹妮Louise 趁住中秋假期，去到多个地方宣传10月1日半价睇戏活动，Louise向市民派爆谷，吸引唔少人同佢自拍。
呢日Louise以新发型亮相，同大家习惯嘅短发型像好唔同，所以有啲市民一时间都认唔出佢，甚至有人喺网上PO相问佢系边个，不过Louise就展现出高EQ，唔单只唔介意，仲留言叫大家记得入戏院睇戏。
Louise就话平时谢票都系来去匆匆，而今次派爆谷就有多少少时间同大家倾吓偈、影到相，期间仲有唔少市民同佢讲，平时正价都会买飞入场支持香港电影业。
由于老公 罗孝勇Sheldon 正于澳洲读紧脊医课程，近排仲开始忙实习，所以今个中秋Louise就同囡囡一齐过，虽然一家三口分隔两地，但系都会尽量安排时间团聚，早前Sheldon先抽时间返香港出席囡囡嘅毕业礼，而Louise亦指平时如果有时间，都会飞到当地陪老公，佢仲话隔一段时间冇见，二人再见返感情都会浓郁啲，大家都会更精心设计行情、珍惜相处时间。
