吕良伟以及太太杨小娟、吴业坤、港姐袁丝珩、邓匡闵、李泽欣、李澄晴、庄思敏、田启文等艺人现身一个庆祝活动。
恋爱真人骚《女神配对计划2》嘅女神阮嘉敏同求爱勇者吴旭东日前出席宣传活动时，当众磨鼻尖已经好有火花，旭东仲拍晒心口话会克服Long D阻隔，令Mandy得到最大安全感。
Mandy呢日就话，节目对自己嚟讲除咗系工作，亦希望可以遇到一个可以将来可以一齐好好生活落去嘅对象，所以都会继续观察旭东。
同场嘅Jacquelin因为早前上载亡母嘅灵堂片段而惹嚟妹妹庄思华不满，两姊妹更因此隔空开火。Jacquelin出席活动时都有开腔回应事件，表示每个屋企之间都会有冲突同矛盾，只系呢件事公开咗，令人觉得好严重，但事件已经过去就算亦无谓追究责任同再讨论，而家人之间亦一直有继续沟通。
同样要为是非传闻解画嘅仲有田启文，早前田鸡接受访问时大爆李力持系双面人，但其实佢就话系被标题党作祟，更笑指李力持唔系双面人，而系八面玲珑、多才多艺。至于讲到未来工作计划，田鸡就话好快会官宣一啲同周星驰嘅合作，会系同电影有关，都想帮助一啲过去合作嘅兄弟，佢都好感动星爷日理万机仲记得以前嘅兄弟，呢份情好难能可贵。
几位港姐呢日就神采飞扬出席活动，啱啱去完韩国旅行嘅李澄晴就开心表示自己日食夜食，亦买咗手信送俾大家。袁丝珩就话，佢好想大家去泰国，因为可以租一栋别墅同一班港姐姐妹一齐住。
