三姐 萧秀香 创办嘅「中国香港女厨师协会」庆祝成立一周年，晚宴除咗有一班女厨师，仲有唔少名人艺人到贺，好似姜大卫、麦长青、李思捷、肥妈、黑妹李丽霞、大王安德尊、梅小青刘家豪夫妇、何太梁安琪同TVB高层杨永祥等。
上年嘅成立大会，修哥胡枫特登来撑场，呢日修哥虽然冇现身，不过John哥就话修哥身体好健康，大家唔需要担心，只系人多嘅地方，修哥就要减少啲出席。又话自从出院之后，修哥就好乖，经已闭咗关成个月。
日前有报道指，John哥喺街头偶遇狄龙大哥，两人相隔多年再次合照，John哥话平时见谭俊彦就多，狄龙真系好耐冇见。
话咁快协会已经成立一周年，三姐话过去一年过得好充实，嚟紧会继续将协会嘅精神发扬光大，佢话好开心见到一众女厨师越嚟越有自信，以往女性喺厨房被较少人接触，而家多咗个协会可以畀厨师互相交流学习。三姐仲好希望可以开拍女厨师嘅饮食节目，将香港嘅厨师继续发光发热，成东方之珠嘅美食香港。
可岚著住厨师服现身盛会，原来佢唔只系一位女厨师，仲系协会嘅董事，过去一年系因为期间参加《中年好声音4》先暂时放低镬铲，佢直言愧对三姐，嚟紧会继续协助协会，自己又会研发咖啡产品同打理咖啡店生意，不过可岚话即使咁忙，都唔会放弃音乐梦想。
