《中年好声音4》嘅6位动物歌手周志康、刘佩玥、罗天宇、莫家淦、姚兵同黄建东倾力筹备嘅演唱会圆满落幕，当晚吸引谭俊彦夫妇、黄日华、颜米羔、关嘉敏、王菲同未婚夫张子丰、孔德贤等捧场。
6位动物歌手献唱多首快、慢歌曲炒热全场气氛，罗天宇唱唱吓就发生咗段小插曲，喺台上突然流鼻血要煞停，幸好一班兄弟立刻顶上，加上有陈懿德呢位廿四孝女友在场悉心照顾天宇，令佢好快可以重踏舞台同谷娅溦演唱。呢晚刘威煌、吴业坤、胡鸿钧、关楚耀同赵浚承分别同动物歌手合唱。
周志文同德德喺开骚期间推出一个特制动物蛋糕，全场一齐贺天宇同阿康生日，德德仲向天宇献香吻高调放闪，二人表现恩爱，及后喺庆功宴上，德德再送上一个天宇专属嘅生日蛋糕，令男友冧爆。
天宇受访时好感激德德所做嘅一切，仲话自己日前病咗，多得女友鼓励同贴心照顾，辛苦德德喺演唱会当日全日做阿四斟茶递水，两人表现sweet，个个叫天宇快啲求婚，应验《玄战》所推测嘅喜事，但天宇同德德话暂时未知，连在场好友都催促佢哋，仲自荐做婚礼嘉宾帮手。
重温《中声4》激烈比赛过程
另外阿康同Moon喺完骚后同样表示好不舍，因为大家好难得有呢个演出机会，加上大家都好熟络，知道走到呢一步嘅经历，一切得来不易，令佢哋特别感动。
