F4成员周渝民（仔仔）、吴建豪（VanNess）、言承旭（Jerry）及五月天阿信组成F✦FOREVER，日前喺杭州举行一连两日演唱会。虽然两场骚撞上天气不佳兼落暴雨，不过风雨无阻粉丝嘅热情，最终两日顺利开场。
四子喺杭州站特别精心为歌迷炮制惊喜，唔只有旋转花车绕场同全场歌迷互动，作为演唱会制作人之一嘅阿信仲写咗新歌《今夜我要带你高飞远走》喺演唱会首唱，冧爆歌迷！
仔仔、VanNess、Jerry当年凭偶像剧《流星花园》爆红，呢阵「流星雨」风潮一卷就廿几年，成为一代人嘅青春回忆。喺演唱会第一晚，四子邀请当年为剧集唱主题曲嘅哈林庾澄庆做惊喜嘉宾。
哈林一出场即同四子合唱《第一时间》，而且佢同阿信相当调皮，喺唱出剧集主题曲《情非得已》前一直大卖关子吊大家瘾，哈林更即兴唱咗几句自己嘅金曲，令大家都好开心。
最后哈林同FF齐齐带动全场合唱《情非得已》，呢一Part勾起好多为重回青春时代而去呢场演唱会嘅歌迷回忆，喺网上分享感受，觉得好似坐咗时光机重返二十岁一样！
