「金牌媒人」林盛斌（Bob）主持嘅TVB恋爱真人骚《女神配对计划2》，逢周日晚上8点半于翡翠台播映。 呢个星期日（4 日）播出第五集，五位女神何沛珈（Roxanne）、阮嘉敏（Mandy）、陈若思（Amber）、俞可程（Kanis）及郭珮文（Juliana）与 16 位求爱勇者，继续进行五角台淘汰环节！
今集除咗有郭珮文及俞可程嘅「主菜饭脚」通关考验，仲有「甜品饭脚」争夺战。今季由三角台升级五角台，呢张五角台更可一分为五，各自独立成为一张三角台，换言之成功争取「甜品饭脚」嘅求爱勇者，将可以与心仪女神撑台脚叹甜品，16位「求爱勇者」出尽九牛二虎之力争崩头。
今日制作组率先公布Mandy「甜品饭脚」争夺现场。当Mandy嘅关键词「暖」一出，与Mandy心意相通吴旭东（东东）及谭梓乐（Hepta）即一支箭标向前争櫈坐，二人咁啱睇中同一张櫈兼飞扑丧争，场面极度混乱。
东东索性成张櫈擸走兼直接放喺Mandy面前坐下，伸出拳头示意Mandy来个「fist bump」，行径极浪漫有型兼霸道，眼见东东「霸总式」示爱，令现场所有女神及花生团全线陷入疯狂叫嚣状态。
Mandy全程笑到个嘴合唔埋，事后Mandy坦言觉得东东好Man，就连出名要求高嘅阿Bob，对东东表示钦佩，当宣布东东有资格成为Mandy「甜品饭脚」候选人之一，忍唔住赞东东有型，东东搞笑咁向全场鞠躬致谢。
虽然今季《女神》讲明「心意相通」对象随时洗牌，但东东明显全心全意冲著Mandy而来，而且争夺女神芳心绝不手软，痴情程度令其成为花生团团宠。东东为咗与Mandy同台，出尽全力冲锋争取Kanis「主菜饭脚」名额、更一度因用力过猛变滚地葫芦兼电话都飞埋出嚟。
Mandy与东东一样长情，喺玩游戏期间，透露曾「钟意咗一个人九年，但我哋冇一齐过」，引发全场震惊，花生团赞Mandy好专一，Mandy解释因小学三年级开始喜欢佢，升中学时再跟他同一个学校，佢不停同好多女仔一齐，等极都系未到自己，就觉得失望够啦，望住佢就有一种青春嘅感觉。Mandy大方得体、又如此长情，难怪有网民热捧Mandy为「女神天花板」。
