黎姿生日撞正国庆，佢年年国庆日都会同屋企人一齐庆祝，今年都唔例外。今年迎来55岁嘅Gigi，例牌post咗同屋企人庆祝生日嘅靓相，见到Gigi同父母、细佬黎婴嘅合照，一家四口笑容灿烂，不过就唔见老公马廷强同三个女入镜。
除咗有屋企人陪伴，Gigi呢个生日仲收到几个蛋糕同好多好靓嘅花束，足见佢嘅好人缘。Gigi喺呢个重要日子，当然要悉心打扮，著上大红色长裙，同早前一身黑西装，戴眼镜出席公司股东大会嘅女强人look大相迳庭。
寿星女Gigi喺社交平台写到：「收到许许多多真挚的生日祝福，心里满是感动与温热。生日对我而言，不只是属于自己的日子，其实也是感恩的一天。感恩有我的家人，我父母在这一天诞生了我。感恩我有一班很好的朋友，支持我的同事。很多人问我生日要什么礼物，我觉得最重要就是在我身边疼我、爱我的人，他们每一个都健康、平安、开心，这就是我最好的礼物。好开心每年生日都有你们陪我度过这个特别的日子，愿爱一直环绕著我们，日子温馨顺遂。」最后黎姿仲不忘祝大家国庆节快乐，祝祖国繁荣兴旺！
