TVB台庆剧《璀璨之城》10月12号将会喺翡翠台首播，呢日一班演员们 张智霖、吴卓羲、姜大卫、江美仪、张曦雯、高海宁 同 陈炜 以剧中型格造型上阵拍摄宣传海报，Kelly嘅大露背造型同高Ling一身装扮，散发出浓厚嘅女人味。故事围绕家族酒店集团嘅两兄弟Chilam同阿Ron展开连场豪门明争暗斗，Chilam率先剧透时，就以「峰回路转」同「离谱」来形容剧情，仲以「邪恶」嚟形容自己嘅角色。
阿Ron喺剧中一直系哥哥嘅眼中钉，面对仇恨佢形容自己阴险得嚟又唔会太出面，佢话拍摄呢套剧最开心就系可以同Chilam斗演技。
早前有传阿Ron同Kelly因为拍呢套剧戏假情真，喺角色上Kelly会瞓身帮老公阿Ron争取一切，饰演一个恋爱脑嘅老婆，Kelly话最初好难拿捏，因为好难想像爱一个人可以爱到连命都唔要，要用唔少时间先可以投入角色。
John哥同江美仪饰演一对，佢系一位严父同家族掌陀人，无论管教Chilam同阿Ron两兄弟，或者喺生意上都好锋利，就连John咁好戏都话演绎呢个角色好吃力，因为角色同佢真人相差太大，事关佢本人系一个慈父。至于美仪姐就搞笑话自己嘅角色有精神病，所以系本色演出，佢仲剧透自己喺剧中成日都要打人，所以好考体力。
饰演检控官嘅高Ling以多套优雅服饰上阵拍摄，面对周遭嘅激烈斗争，高Ling自认系比较有良知嘅一位，事关自己喺剧中有一个非常善良嘅妈妈，面对险恶嘅环境，始终相信人性本善。
炜哥一身霸气女强人look现身，佢系 John哥集团旗下嘅得力要员之一，见到 Chilam同阿Ron势成水火，佢自己嘅角色就以利益为出发点，难免会偏帮，至于佢偏帮边个，大家就要睇剧先知啦！
