参与《中年好声音》首季再出发而夺冠嘅 周吉佩 10月8号就迈入40岁，虽然仲有几日先生日，不过一众好友就提早为佢庆祝，仲特登静静鸡为佢安排一个突击惊喜，令到佢O晒嘴呆若木「吉」非常感动。
吉吉指日前获好友相约食私房菜，自己即时应承，点知去到餐厅一开门，就发现整个中声家族不论系主持 车婉婉 评审 肥妈 张佳添 周国丰 导师韦绮姗，仲有各届嘅参加者原来都一早已埋伏现场，齐齐开纸炮大叫生日快乐，令寿星本人呆立当场唔识反应。
呢日大家仲似乎一早有晒准备，齐齐戴上太阳眼镜为吉吉送祝福，现场更有一张巨型海报预祝佢「唱出宇宙赚大钱」，认真有心。而吉吉亦留言写道：今年40岁生日，本来只系打算低调庆祝，无谂过收到咁大惊喜，好多谢一班中年家族好友嘅心意，我衷心祝福大家身体健康、大红大紫！！」
之后又贴出多张合照，再写道话：「估唔到当年呃住老婆参加比赛，今天会得到咁多嘢，除咗改变咗我嘅生活外，仲得到咁多爱。🫶 感恩 🥹今次特别多谢周太嘅心思，到你呃返我两个月。」
「男人40，好感触！多谢上天给予我精彩嘅上半场，遇到美好嘅每一位好友。美酒佳肴、良辰美景，挚友知己。多谢这次惊喜派对🎉🍾🫶」
