恋爱真人骚《女神配对计划2》当中嘅 阮嘉敏 同内地型男演员 吴旭东，将「霸道总裁剧本」搬到现实！两人因合作拍网络短剧而结缘，而吴旭东竟不远千里飞到香港参加节目，更指名要追求曾合作演出短剧《瘦一斤，赚一斤，虐哭前任不过瘾》嘅阮嘉敏，呢份诚意已令唔少观众高叫甜到入心喇。
阮嘉敏 同 吴旭东早前于短剧中饰演情侣，吴旭东今次更由短剧男主角秒变「真人骚情圣」，追嚟香港为夺女神芳心。虽然部份观众质疑「到底系节目效果定系真爱火燃烧」，但两人戏里戏外嘅默契同眼神交流，就已令节目观众非常投入喇。
而同为「女神」嘅 何沛珈 于新一集节目播出前，于社交平台贴出一段助攻短片，标题以「Helping my friend to meet her crush（帮朋友见心上人）」为主题。
片段中，Roxanne陪Mandy散步，而吴旭东正喺旁边低头睇手机。阮嘉敏当时一脸害羞，点知Roxanne竟然使出一招「友情神助攻」，直接将Mandy推到吴旭东身边，然后即兴奋跑开。而被「突袭」嘅吴旭东瞬间扶实伊人，两人相视甜笑，真系冧到毛管栋呀！
虽然只系为节目宣传嘅影片，不过爆笑又充满爱意嘅「助攻现场」片段曝光后，网民就纷纷留言大赞，好似话Roxanne呢个朋友识得过，仲有人认为Mandy同阿东眼神已出卖心中情喇。
35岁嘅阮嘉敏自参选港姐入行后，曾担任《东张西望》主持同参演多部剧集，Mandy外型甜美加上亲和力十足，早已系唔少男士心中女神。而吴旭东就凭帅气外表同挺拔身材，于短剧界累积唔少人气。今次两人由「短剧拍档」火花延伸到真人骚节目，究竟最后系咪可以修成正果呢？
《女神配对计划2》今晚 20:30 翡翠台